Policia ka asgjësuar 4118 bimë narkotike në Lezhë, Mirditë dhe Krujë. Sipas informacioneve zyrtare, në Krujë janë asgjësuar 1200 bimë, ndërsa në Mirditë e Lezhë 2918
Policia njoftoi se në fshatin Kashnjet të njësisë administrative Ungrej, rrethi Lezhë, janë gjetur të kultivuara në tokë në zonë të shpyllëzuar 2400 bimë, si dhe në fshatin Zall Xhuxhë të njësisë administrative Fan, rrethi Mirditë, janë gjetur edhe 518 bimë të tjera të dyshuara narkotike cannabis sativa të kultivuara në tokë në zonë të shpyllëzuar.
Bimët narkotike, pas kryerjes së veprimeve procedurale, u asgjësuan nëpërmjet djegies.
Ndërkohë në Krujë, ku u asgjësuan 1200 bimë narkotike, në operacion janë të përfshirë 10 grupe kontrolli me 80 forca policore dhe 7 dronë.
Operacioni është shtrirë në Malësinë e Krujës dhe në territore të tjera të rrethit të Krujës.
Gjatë një prononcimi, shefi i Komisariatit të Policisë Krujë Komisar Kreshnik Alimadhi ka bërë me dije se aktualisht është duke u zhvilluar faza e 29-të e operacionit dhe gjatë kësaj faze janë asgjësuar rreth 1200 bimë të dyshuara kanabis, si dhe është vënë në pranga 1 shtetas.
Operacioni është në zhvillim e sipër dhe shefi i Komisariatit të Policisë Krujë është shprehur se në bashkëpunim me Prokurorinë pranë Gjykatës së Shkallës së Parë të Juridiksionit të Përgjithshëm Tiranë, vijojnë hetimet e thelluara për identifikimin e shtetasve të tjerë të implikuar gjatë të gjitha fazave të këtij megaoperacioni.
Discussion about this post