Ish-kryeministri Sali Berisha tha në konferencë për mediat se shqiptarët janë shndërruar në popull të gomoneve. Berisha shprehet se rritja e çmimeve ka bërë që kriza të jetë e madhe. Sipas Berishës, shqiptarët janë duke u varfëruar në mënyrë ekstreme.
“Jemi në një moment kur njësoj si në ‘90-ën kemi pushtuar lajmet si populli i gomoneve dhe zhvillohet një dramë shekspiriane në kanalin e La Manshit ku mijëra shqiptarë largohen për shkak të qëndrimeve, politikave jo humane e antishqiptare të Edi Ramës dhe qeverisë së tij. Ky shpopullim i shpejtë marramendës i vendit tejkalon ritmet e shpopullimeve nga luftërat civile apo katastrofa të tjera natyrore. Nga 2014 deri në 2021 vetëm në BE u larguan nga vendi 744 mijë qytetarë sipas Eurostati. Kjo fugë e madhe, ky largim i madh nga vendi është rezultante e vjedhjes së shqiptarëve nga një qeveri që bën gjithçka me të gjitha vendimet dhe ligjet që ndjek, pasurohet vetë dhe vjedh qytetarët. Mediat britanike në unison kanë bërë fjalë për largimin e shqiptarëve nga varfëria, por nëse shohim përtej saj gjejmë vjedhjen e fondeve publike të shqiptarëve si askund tjetër dhe është kjo pikërisht që nuk lejon rrogat dhe pensionet e tyre të rriten, përkundrazi ato për shkak të inflacionit ulen.
Shqiptarët varfërohen në mënyrë të tmerrshme nga çmimet, askund nuk ka borde komuniste si në Shqipëri të cilat kryeministri i lavdëron dhe mban çmimet në qiell. Ushqimet bazë në vend janë 7 herë më të larta se në BE, kur rroga është 6 herë më e ulët, nafta në nivelet më të larta, krahas këtyre Edi Rama ka shndërruar pasuritë publike në mallkim për vendin, energji përdoret si një shpatë Demokleu, si ajo përdoret si kamxhik për shqiptarët në një kohë kur rezervat ujore kanë siguruar 100% të konsumit të energjisë. Shqiptarët janë viktimë e bixhozit që luhet me energjinë, energjinë që prodhohet ua shesin agjentëve të tyre me çmim më të ulët se bursa dhe kjo rieksportohet. Kjo është e faktuar, njerëzit nuk e ndjejnë por vjedhjet me energjinë janë të paimagjinueshme”, u shpreh Berisha.
Discussion about this post