Pasditen e sotme, u luajtën disa nga takimet e raundit të dytë të fazës në grupe të UEFA EURO U21 2023, që këto ditë po zhvillohet në Rumani dhe Gjeorgji.
Ndeshja kryesore e orës 18:00, ajo mes Portugalisë dhe Holandës, u mbyll me rezultatin e barabartë 1-1. Me luzitanët dhe “oranje” të cilët siguruan nga një pikë, në duelin e luajtur në kryeqytetin gjeorgjian, Tbilisi.
Pavarësisht rasteve të shumta për gol që në fillim, holandezët ishin ata që e pësuan të parët.
Në minutën e 20’, Almeida dërgoi në epërsi bashkatdhetarët e Cristiano Ronaldos.
Pas golit të pësuar, holandezët e shtuan ritmin e sulmeve të tyre në kërkim të barazimit por portugezët, u treguan solidë në prapavijë, duke e mbyllur në epërsi pjesën e parë.
Në 45 minutat e dyta, skenari i lojës nuk ndryshoi, me “portokallinjtë” (sonte me uniforma blu), të cilët sulmonin pa u lodhur, ndërsa Portugalia mundohej që të shfrytëzonte kundërsulmet.
Në minutën e 78’ rezistenca portugeze, më në fund, u thye, me Brobbey që barazoi shifrat duke mposhtur nga brenda zonës portierin luzitan.
Ky ishte goli i fundit i takimit, me të dyja skuadrat që nuk arritën të gjenin golin e fitores.
Me këtë barazim, Portugalia fitoi pikën e parë, në këtë turne, megjithatë, gjendet ende në vendin e fundit në grup, një pikë pas Holandës dhe Belgjikës si dhe tre pikë pas Gjeorgjisë.
Takimi tjetër i këtij, ai që vuri përballë Belgjikën me një nga vendet organizatore, Gjeorgjinë, u mbyll me rezultatin 2-2.
Discussion about this post