Lëkundjet e tërmetit që u ndjenë në qarkun e Dibrës dy ditë më parë, kanë vazhduar të ndihen edhe 48 orët e fundit, ndonëse më të lehta.
Ndërkohë që nga emergjencat Civile njoftuan se bëhet fjalë për disa dhjetëra banesa që kanë pësuar dëme, Prefekti i qarkut Dibër, Nexhbedin Shehu, dhe kryebashkiaku i Bulqizës, Lefter Alla kanë konfirmuar për Report Tv se mbi 110 banesa kanë rezultuar të dëmtuara.
Shehu bëri me dije se 110 banesat e dëmtuara janë të gjitha të banueshme, dhe nuk ka asnjë rrezik për banorët e zonës së prekur nga tërmeti i 2 ditëve më parë.
“Të gjitha banesat janë të banueshme. Nga kryetari i bashkisë janë ngritur 3 grupe të verifikimit në terren. 2 prej ndërtesave të dëmtuara janë të njësive administrative. Ne jemi në kontakt me banorët e dëmtuar. Jemi të gatshëm të ndihmojmë me materiale emergjente banorët nëse do të jetë e domosdoshme. Në përgjithësi janë ndërtesa të amortizuara, të prekura nga tërmetet e tjera. Bashkia, Prefektura dhe emergjencat civile janë pranë banorëve”, tha Shehu.
Nga njoftimi zyrtar i institucionit të prefektit, mësohet se nga 110 ndërtesat e konstatuara, 70-75 kanë dëmtime të lehta, ndërsa 30-35 janë me dëmtime të mesme.
Sipas Institutit të Gjeoshkencës tërmeti që goditi Dibrën ishte me magnitudë 4.5 ballë. Lëkundja ishte me epiqendër në Bulqizë dhe thellësi 14 kilometra. Sipas IGJEUM, vetëm 6 minuta para lëkundjes 4.5 ballë, është regjistruar një tjetër tërmet 3.3 ballë.
Ndërkohë që Bulqiza vijon të përballet me lëkundjet e tërmetit, ku vetëm brenda 48 orëve janë shënuar 7 të tilla.
