Këngëtarja shqiptare në Maqedoni të Veriut, Adelina Tahiri ka ndarë detaje të trishta nga tragjedia në Tetovë, ku humbën jetën 14 persona për shkak të zjarrit në spital.
Në një intervistë për “Ftesë në 5”, ajo tregoi se punonjësja e saj kishte humbur vajzën e tezes nga flakët, vetëm 20 vjeç. E reja nuk ishte në gjendje të mirë prej koronavirusit dhe ishte asfiksuar prej tymit.
“Duhet dikush duhet të mbajë përgjegjësi. Punonjësja që punon tek unë sot erdhi në shtëpi duke qarë se vajza e tezes kishte qenë aty dhe kishte ndërruar jetë. Nuk e kishte përballuar dot nga tymi. Ishte 20 vjeç. Tek ne nuk gjykohen asnjëherë kur bëjnë gabime, gjykohen vetëm kur janë në opozitë. Po mundohem të jem e fortë dhe të mos lëshoj lot. Ka shumë nëna që e dinë se është shumë e vështirë të bësh fëmijë dhe ta humbësh kështu…,”-tha ajo.
14 viktima u shënuan nga zjarri në spitalin modulor të Tetovës, ndërkohë që ka nisur hetimi për shkaqet e ngjarjes së rëndë. Dyshohet se godina kishte probleme në strukturë dhe ndërtim, probleme të denoncuara që në muajin prill 2021.
