Në kohën kur po rriten çmimet, në rrjete sociale qarkullon një video ku është ish-zëvendëskryeministri, Erion Braçe shfaqet duke bërë fushatë në vitin 2013, dhe ku premtonte naftë pa akcizë, plehra kimike pa TVSH, si dhe ushqime pa TVSH.
Për këtë, deputeti socialist Erion Braçe siç duket është vënë në siklet dhe në një postim në facebook, ai justifikohet duke thënë se në këto 30 vite të gjithë kanë dështuar që të ndërtojnë tregje të hapura, të lira dhe konkurruese.
Ai ka analizuar një më nga një premtimet dhe e pranon se ushqimet pa TVSH janë një premtim i pambajtur, por një angazhim i tillë sipas tij është efektiv në tregje të hapura, të lira, konkurruese dhe jo në tregje të përqendruara, ku çmimet caktohen nga një grusht biznesmenësh.
Braçe shkruan se në çdo treg produkti apo shërbimesh, ka 2, 3, 4 kompani që kontrollojnë tregun, bashkërendojnë sjelljen, caktojnë çmimet, ndajnë fitimet për vete e kurrë për konsumatorin. Më tej Braçe tha se ndodh që në atë treg ka 10 kompani, po 90% e tregut e kontrollojnë dhe gëzojnë 2-3 kompani.
