Pak orë më vonë Kuvendi do të votojë për president të përzgjedhurin nga PS, Bajram Begaj. Por, nëse ora e votimit po afron demokratët nuk po bien dakord mes tyre se si do të veprojnë. Deputeti i Partisë Demokratike, Ervin Salianji është kundër bojkotit të seancës së sotme të Kuvendit, të thirrur nga Alibeaj.
Teksa Enkelejd Alibeaj u bëri thirrje deputetëve që të mos jenë sot në sallë, Salianji shprehet se bojkoti po kërkohet nga ai që u ul këmbëkryq me të zgjedhurit nga Rama. “Është e papranueshme që tu kërkohet gjithë deputetëve të bojkotojnë parlamentin ndërkohē që i vetmi bojkot duhej të ishte ulja në tavolinën joformale të Ramës dhe të zgjedhurve të tij”, shprehet ai.
Sipas Salianjit, ai e paralajmëroi që në fillim se emri i presidentit të ri ishte vulosur nga kryeministri Rama, prandaj dhe me insistim i ka kruar demokratëve që të mos bëjnë pazare me të. Salianji thotë se Alibeaj e shiti PD dhe tashmë nuk kanë më asnjë forcë që të veprojnë.
“Është naivitet vrastar dhe inat jopolitik të braktisësh institucionet nga mllefi që “nuk ju dha pazar” por u përdorën! Si mund të propozohet bojkoti, mënyrë tipike lindore kur si parti luftojmë në emër të vlerave perëndimore! E kam paralajmëruar që në fillim të procesit që kandidatin e kishte mbyllur Rama në zarf dhe do e nxirrte në fund siç edhe ndodhi. Kam kërkuar me insistim që Partia Demokratike mos hynte në pazare ne tavolina jo institucionale por të ulej vetëm dhe vetëm nëse maxhoranca ilegjitime i jepte të drejtën e propozimit vetëm opozitës! Sot pasi e dështuan atë pazar negociatë a ka të drejtë publiku të mendojë se gjithçka u bë për interesa personale? A ka qytetar që i jep dot shpjegim se si Partia Demokratike i jep kuorum dhe merr pjesë në seancat 5 minutëshe ku digjeshin raundet pa kandidatë dhe ku kuorumi duhej të ishte 84 deputetë”, shprehet ai.
Discussion about this post