Presidenti Bajram Begaj, me anë të një postimi në rrjetet sociale, ka përkujtuar viktimat e sulmeve terroriste të 11 shtatorit 2001 mbi qytetin e New Yorkut.
Në Facebook, Begaj shkruan se vendi ynë “riafirmon qëndrimin e saj të vendosur kundër çdo forme terrorizmi dhe dhune, kudo në botë”.
Mesazhi i Presidentit të Republikës:
Sot, me dhimbje të thellë, përkujtojmë viktimat e sulmeve terroriste të 11 shtatorit 2001 mbi qytetin e New Yorkut.
Shqipëria riafirmon qëndrimin e saj të vendosur kundër çdo forme terrorizmi dhe dhune, kudo në botë, dhe shpreh solidaritetin e saj të plotë me familjet e viktimave, popullin dhe institucionet e Shteteve të Bashkuara.
Më 11 shtator 2001, botën e tronditi një nga sulmet më të tmerrshme në histori, kur dy avionë të rrëmbyer nga Al Qaeda goditën Kullat Binjake të Qendrës Botërore të Tregtisë në SHBA, duke shkaktuar 2.752 viktima, përfshirë 343 zjarrfikës dhe 60 policë. Sulmet përfshinë gjithashtu Pentagonin dhe një avion që u rrëzua në Pensilvani, duke lënë pas një shkatërrim të madh dhe një ndarje të thellë të historisë globale. Mes viktimave ishin dhe rreth 40 shqiptarë, të cilët jetonin dhe punonin në Shtetet e Bashkuara, kryesisht nga Shqipëria, Kosova dhe Maqedonia e Veriut.
Disa prej tyre ishin punonjës të Kullave Binjake, të tjerë pasagjerë në avionët e rrëmbyer dhe disa edhe në Pentagon. Humbja e këtyre jetëve ishte një tragjedi e rëndë për komunitetin shqiptar dhe për diasporën, e cila asokohe ishte ende në zhvillim në SHBA. Sot, 24 vjet më pas, në vendin ku dikur ngriheshin Kullat Binjake, qëndron Kulla e Lirisë (Freedom Tower), si një simbol i qëndresës dhe kujtimit për të gjithë ata që humbën jetën. Përkujtimet çdo vit janë një mundësi për të nderuar jetët e humbura dhe për të ruajtur kujtimin për ata që u bënë pjesë e tragjedisë më të madhe të historisë moderne.
Discussion about this post