Partia Socialiste do të mbledhë pasditen e sotme Kryesinë, ku do të vendoset një datë mbi mbledhjen e Asamblesë Kombëtare, që do të vërë në zbatim vendimet e Kongresit të 9 prillit, si dhe do të diskutohet për hapat e ardhshme për zgjedhjen e Presidentit të ri.
Mbledhja do të mbahet në orën 18:00 ku pritet të jetë i pranishëm edhe kryeministri Edi Rama. Kujtojmë se në kongresin e PS-së, të mbajtur në Tiranë më 9 prill, u miratuan edhe disa ndryshime në statut. U ndryshua mënyra e zgjedhjes së kryetarit të partisë në rang bashkie, ku për herë të parë do të merret mendimi i qytetarëve të zonës.
Ndërkaq, do të shkarkohen në bllok 61 kryetarët aktualë të PS në rang bashkie dhe në fillim të qershorit pritet të zhvillohen zgjedhjet për zëvendësimin e tyre.
Mbledhja e kryesisë së PS-së vjen në një kohë kur priten dhe propozimet për emrin për Presidentin e ri. PS ka mbyllur fazën e parë ku socialistët propozuan në një zarf tre emra me kandidatët për Presidentë, ndërsa më 4 maj pritet të mblidhet konferenca e kryetarëve për diskutimet rreth Presidentit.
Discussion about this post