Partia Socialiste nisi një ditë më parë procesin për zgjedhjen e presidentit të ri ku deputetët e PS hodhën në kuti zarfin me tre emra të propozuar. Ndërsa sot do të ketë një takim mes kryetarëve të grupeve parlamentare.
Kreu i grupit të PS, Taulant Balla ka bërë me dije më herët se do të takohen në ambientet e Kryesisë së Kuvendit me Enkelejd Alibeajn, Mesila Dodën dhe Fatmir Mediun, ndërsa ka lënë jashtë Komisionin e Rithemelimit dhe LSI.
Sipas tij, seanca e konsultimeve pritet të mbyllet para datës 29 prill dhe në fillim të majit të bëhen seanca e para për zgjedhjen e presidentit. Ndërkohë, një ditë më parë Enkelejd Alibeaj u shpreh se grupi i PD do të mblidhet për të vendosur nëse do të marrë pjesë dhe si do veprohet për procesin e zgjedhjes së Presidentit.
Partia Socialiste i ka bërë ftesë edhe shoqërisë civile për të marrë pjesë në diskutimet për zgjedhjen e Presidentit të ri të vendit. Komsultimet me shoqërinë civile do të zhvillohen në orën 15:00, ku të pranishëm do jenë 3 të mandatuarit nga mazhoranca, Taulant Balla, Elisa Spiropali dhe Damian Gjiknuri.
Ndërkohë, pas bisedimeve me shoqërinë civile, përfaqësuesit e mazhorancës do të zhvillojnë takim me kryetarët e Grupeve Parlamentare.
Discussion about this post