Deputeti Edi Paloka ka folur sonte në një interviste televizive lidhur me procesin për zgjedhjen e presidentit të ri. Ai e ka quajtur këtë një Teatër të madh që ka regjisor Edi Ramën. Ai tha se Ramës i duhet një vëmendje mediatike, ndaj dhe po bën show. Sipas deputetit të PD, duket pak e vështirë që të sigurohen 84 votat, qoftë edhe nëse Enkelejd Alibeaj do të bjerë dakord me Taulant Ballën.
“Po bën shfaqje për zbavitjen e shqiptarëve, pasi ai e ka në kokë emrin e Presidentit të ri dhe do e zgjedhë me 71 vota. Nuk e besoj se Alibeaj do të shkojë deri në këtë pikë, jo se nuk ka dëshirë, por se ndodhet në një pozitë të vështirë”, tha Paloka.
Ai tha se gjithsesi duhet parë se deri në çfarë niveli bashkëpunimi do të shkojë Alibeaj për të bashkëpunuar me Ramën. “Vetëm një naiv nuk do e kuptonte që në takimet e zhvilluara të mos ishte çështja e Presidentit”, tha Paloka. Në fund ai u shpreh se, Enkelejd Alibeaj nuk është më kryetar i Grupit Parlamentar i PD dhe nuk përfaqëson PD-në.
Discussion about this post