Presidenti i Shteteve të Bashkuara, Donald Trump, ka deklaruar se beson se presidenti rus Vladimir Putin është i gatshëm të arrijë një marrëveshje për t’i dhënë fund luftës në Ukrainë.
Në një intervistë për Fox News, Trump u shpreh optimist se konflikti mund të përfundojë përpara se të mbarojë mandati i tij në nëntor të vitit 2028.
I pyetur nëse lufta do të marrë fund gjatë presidencës së tij, Trump u përgjigj me bindje se kjo është e mundur, duke shtuar se fillimisht kishte menduar se zgjidhja e konfliktit do të ishte shumë më e shpejtë.
“Mendova se lufta do të mbaronte më herët. Besoja se ishte çështja më e lehtë për t’u zgjidhur, sepse kam marrëdhënie të mira me të dy udhëheqësit”, deklaroi ai.
Trump zbuloi gjithashtu se ka qenë në komunikim të vazhdueshëm me presidentin rus Vladimir Putin dhe theksoi se, sipas bindjes së tij, Kremlini është i gatshëm të negociojë një marrëveshje paqeje.
Deklarata e presidentit amerikan vjen pasi ai kishte premtuar vazhdimisht gjatë fushatës së tij se do t’i jepte fund luftës në Ukrainë brenda 24 orëve ose në ditën e parë të rikthimit në Shtëpinë e Bardhë.
Megjithatë, konflikti vazhdon, ndërsa përpjekjet diplomatike për një armëpushim dhe një marrëveshje paqeje mbeten në qendër të vëmendjes ndërkombëtare.
Discussion about this post