SPAK i kërkoi Gjykatës së Posaçme deklarimin e fajshëm të9 personave të dyshuar si anëtarë të një grupi kriminal, që trafikonin e më pas shisnin në tregun e zi në Shqipëri sende të çmuara të vjedhura apo blera në Francë.
Mes të pandehurve është edhe Sokol Idrizaj, ish-shofer i Ardi Veliut, gjatë kohës që mbante detyrën e kreut të Policisë së Shtetit dhe tre anëtarë të familjes së tij.
Duke i konsideruar fajtorë në role përkatëse për veprat penale të “grupit të strukturuar kriminal”, “fshehje e të ardhurave”, “kontrabandë me mallra të tjerë”, “tregtim e transportim i mallrave kontrabandë e “ushtrim pa licensë të veprimtarisë bankare”, prokurori i SPAK, Adnan Xholi, kërkoi dënimin me 12 vjet burg për Sokol Idrizajn.
E njëjta masë dënimi u kërkua edhe për bashkëshorten e tij, Elda Idrizaj, si edhe për Agustin Mesulin e Altin Dodën. Për shkak të gjykimit të shkurtuar, dënimi përfundimtar i kërkuar për ta shkoi në 8 vjet.
Dënime përfundimtare me nga 6 vjet e 4 muaj burg u kërkuan për të pandehurit Florian Baku e Egi Idrizaj. Për Bora Idrizajn, SPAK kërkoi pezullim të dënimit me 4 vjet burg dhe konvertim në 5 vjet Shërbim Prove, ndërsa për Vangjush Kasharën e Tomor Barutin nga 4 vjet burg secilit.
Hetimi i këtij grupi të dyshuar kriminal nisi në qershor 2022, pas sinjalizimit nga autoritetet e Prokurorisë së Lionit në Francë. Hetimi i mëtejshëm me një skuadër të përbashkët hetimore zbuloi se një grup kriminal në Francë që siguronte përmes vjedhjes apo blerjes tek vjedhësit e sendeve të çmuara, bizhuteri ari, ora dore, apo pajisje elektronike, koordinohej me një grup në Shqipëri.
Sendet transportoheshin në rrugë tokësore, të fshehura në mjetet e disa agjencive udhëtimi. Në portin e Durrësit, kalimi i tyre garantohej falë bashkëpunimit më dy punonjës të policisë kufitare, ndërsa më pas shiteshin në tregun e zi vendas.
Nga kontrollet e SPAK në Shqipëri për këtë hetim u sekuestruan 59 mijë euro, 10 mijë dollarë kanadezë, 57 ora dore të çmuara, 28aparate celularë, syze dielli të markave të njohura, parfume dhe veshje të firmave prestigjioze.
gijotina.com/
Discussion about this post