Max Allegri është prezantuar ditën e sotme për herë të dytë në karrierë si trajner i Juventusit, pas dy vitesh pushime, që nga ndarja e fundit me bardhezinjtë. Në konferencën e mbajtur për mediet ai foli për objektivat dhe lojtarë specifike, duke përmendur edhe pritshmëri ndaj tyre.
“U ndjeva si të isha 18 vjeç kur fillova stërvitjen, i lumtur dhe i kënaqur. Filloj një cikël të ri me një ekip të shkëlqyeshëm. Ka shumë talentë të rinj që kanë mundësi dhe duhet të kenë dëshirën për t’u përmirësuar. Ata janë e ardhmja e këtij klubi.
Së bashku me ta, lojtarët me përvojë si Ronaldo, Chiellini dhe Bonuçi, duhet të jenë vlerë e shtuar. Kam kaluar pesë vite të mrekullueshme, por dy vite më parë vendosëm të ndanim rrugët. Duhet të vijë muaji mars për të parë nëse mund t’i arrijmë objektivat tanë.
Ndjehem krenar për faktin që Juventusi më thirri përsëri dhe për dashurinë e tifozëve. Nga 22 gushti duhet të fitojmë pikë. Ajo që kemi arritur nuk na ndihmon për të fituar trofe të tjerë, uhet të mendojmë për atë që duhet të bëjmë. ADN-ja e Juves është e përpiktë, fitoret vijnë përmes sakrificës.
Ronaldo është kampion i madh, lojtar i jashtëzakonshëm dhe djalë i zgjuar. Kam folur me Cristianon, i thashë se ky vit është i rëndësishëm. Jam i lumtur që e gjeta këtu. Ka një përgjegjësi më të madhe se tre vjet më parë. Pres shumë prej tij për sa i përket përgjegjësisë. Dybala dhe Rabiot? Paulo Dybala është paraqitur shumë mirë fizikisht dhe mendërisht. Është një futbollist që shënon. Kam folur me të dhe e shoh shumë mirë. Do të thosha se mund të kemi një sezon të shkëlqyer. Rabiot është një lojtar që ka cilësi të rëndësishme.
Si mesfushor duhet të shënojë më shumë gola sesa vitin e kaluar (3). McKennie ka instinktin për gol. Është fat që kjo skuadër ka lojtarë që shënojnë shumë gola. Në fund të kampionatit duhet të shënosh 75 gola: duhet t’i gjesh mes sulmuesve, të cilët shënojnë 40-45 dhe pastaj pjesën tjetër te mbrojtësit dhe mesfushorët.
Titulli? Do të jetë një kampionat i ekuilibruar. Milani është rritur, lojtarët e tyre të rinj janë një vit më të vjetër. Milani është favorit, së bashku me Interin, Juventusin dhe Romën, Napolin e Lazion. Do të jetë e rëndësishme të kemi vazhdimësi.
A e refuzova Real Madridin këtë verë? Le të themi po. E falenderoj shumë presidentin Perez për mundësinë që më dha. Zgjodha Juventusin sepse më ka dhënë shumë dhe është një ekip argëtues për të punuar. Janë ekip i ri dhe mund të përmirësohen shumë.
Rinovimi i Chiellinit? Është qesharake t’i ndërpresësh pushimet dikujt që ka luajtur dy vite pa pushim dhe t’i kërkosh të vijë të firmosë kontratën. Para se të shkruani të paktën informoni veten”, tha ndër të tjera Allegri.
