Ish-kryeministri Sali Berisha, ka reaguar sot nëpërmjet një statusi në rrjetin social “Facebook” për shpërndarjen e formularëve “Prindi 1, Prindi 2” nëpër kopshte nga Ministria e Arsimit, duke thënë se kjo është platformë për denatyrimin e familjes shqiptare.
Ai gjithashtu thotë se ky akt zëvendëson vlerat themelore të familjes duke i shndërruar ato në numra.
Platforme për denatyrimin e familjes shqiptare! Miq, Kreu i Meduzës ka urdhëruar ndrikullën e tij të arsimit të shpërndajë fëmijëve në kopshte dhe fillore një formular në të cilin në një akt amoral godet rënd familjen, prindërit defacto asgjësohen shndërrohen thjesht në numra 1 dhe 2.
Te shndërrosh prindërit në numra është përpjekje barbare, primitive të zëvendësosh vlerat themelore, njerëzore dhe hyjnore të familjes dhe ta shkatërrosh e shndërrosh atë në diçka të pavlerë. Ky akt agresiv në rrafshin e vlerave themelor të individit, familjes dhe shoqërisë shënon një poshtërim për prindërit që jetojnë por edhe ata që prehen në paqen e përjetshme.
Berisha e konsideron një akt agresiv në rrafshin e vlerave themelore të individit, familjes dhe shoqërisë shqiptare dhe një përshkallëzim të ri të luftës së egër të Çubrilloviçit shqipfolës kundër qenies sonë kombëtare.
Ky përshkallëzim i ri i luftës së egër të Çubrilloviçit shqipfolës kundër qenies sonë kombëtare vjen pasi ai ka larguar në 4 vite 530 shqiptar nga Shqipëria. Ju bej thirrje prindërve të refuzojnë me neveri plotësimin e këtij formulari antifamilje që kërkon t’i poshtërojë ata para fëmijëve te tyre duke i shndërruar ne numër dhe t’ju shpjegojnë fëmijëve qëllimet djallëzore të formularit të Edvin Ramës. Unë gjithashtu dënoj me ashpërsinë më të madhe politikën çnjerëzore të denatyrimit, shndërrimit të prindërve në numra dhe ftoj shqiptarët të protestojnë kundër armikut te qenies se tyre Edvin Kristaq Rama.
Para disa ditësh ka qarkulluar në rrjet një formular, në të cilin fjala ‘nënë’ dhe ‘baba’ ishin zëvendësuar me termat “prindi 1” dhe “prindi 2”, për regjistrimin në kopshtet dhe çerdhet e Tiranës. Kjo më pas ka sjellë reagime të shumta jo vetëm nga qytetarët, por edhe politikan të ndryshëm.
Pasi u bë tema e çdo portali, Bashkia e Tiranës “pretendon” se formularët që janë shpërndarë janë “fake news”, pasi sipas tyre formularët zyrtarë që përdoren për regjistrimin e fëmijëve në çerdhe dhe kopshte nuk përdoren terma të tillë.
