Kuvendi i Shqipërisë do të zhvillojë sot seancën plenare të rradhës në orën 10:00. Në qendër të rendit të ditës të kësaj seance janë parashikuar raportimet vjetore të disa institucioneve, projektligji për barazinë gjinore, si dhe votimi për anëtarët e Komisionit Rregullator në KQZ.
Zgjedhja e anëtarëve të KQZ-së dështoi në seancën e kaluar, pasi opozita braktisi sallën, pas rrëzimit të kërkesës për ngritjen e komisioneve hetimore për çështjen “McGonigal” dhe zgjedhjet e 11 majit. Projektligji për barazinë gjinore pritet të ngjallë sërish debate.
Kryetari i Partisë Demokratike, Sali Berisha, ka bërë një thirrje publike për një tubim paqësor përpara Parlamentit të Shqipërisë mëngjesin e nesërm, në orën 09:30.
Në një postim në rrjetet sociale, Berisha fton qytetarët të marrin pjesë në protestë për të kundërshtuar, siç e cilëson ai, “projektligjin antikombëtar, antifamilje dhe antifëmijë – projektligjin për barazinë gjinore”, që pritet të kalojë për votim në Kuvend.
Në rend dite janë gjithashtu aktet normative për ndryshimet në buxhetin 2025 dhe për “Planifikimin dhe zhvillimin e territorit”. Gjithashtu raportime do të japin edhe disa institucione, përfshirë Kontrollin e Lartë të Shtetit, Departamentin e Administratës Publike, Komisionin e Prokurimit Publik dhe Autoritetin për Informimin mbi Dokumentet e Ish-Sigurimit të Shtetit.
Gjatë seancës plenare do të diskutohen edhe disa akte normative: Akti normativ për disa ndryshime në ligjin për “Për kontrollin dhe disiplinimin e punimeve të ndërtimit”; akti normativ për disa ndryshime në ligjin “Për planifikimin dhe zhvillimin e territorit”; si dhe akti normativ për disa ndryshme,”Për inspektimin dhe mbrojtjen e territorit nga ndërtimet e kundërligjshme”.
Gjithashtu në rend dite është parashikuar edhe akti normativ për ndryshimin e buxhetit të vitit 2025.
Discussion about this post