Ministria e Financave ka bërë me dije se afati i rivlerësimit të pronave do të shtyhet deri në prill të viti 2022. Në një intervistë televizive ministria ka treguar se shumë shpejtë vendimi për shtyrjen e afatit do të miratohet nga Këshilli i Ministrave, ndërsa ka renditur 3 arsyet kryesore pse do të bëhet ky ndryshim.
“Së pari propozimi për shtyrje vjen si pasojë e pandemisë dhe vështirësive që ka krijuar në qarkullimin e qytetarëve. Së dyti për shkak se emigrantët nuk kanë përfituar pasi kanë qenë të penguar prej kufizimeve të shkaktuara nga pandemia COVID-19. Së treti është problemi i legalizimeve, që t’ju jepet mundësia e përfitimit edhe atyre që kanë legalizuar shtëpitë e tyre së fundmi”, është shprehur ministria.
Ndërkohë për të shtyrë procesin e rivlerësimit sipas burimeve ka dakordësi mes institucioneve. Tatimi për të rivlerësuar pronat është 3%, nga 15% që është tatimi normal që paguhet në rast se shet pronat. Në total deri në fillim të këtij muaji kishin aplikuar për të kryer rivlerësimin e pronave 56,623 qytetar, dhe ishin arkëtuar në nga ky proces 30,6 milionë euro. Synimi i ligjit ishte që të rivlerësoheshin në total 50 mijë pasuri të paluajtshme dhe të arkëtoheshin rreth 49.8 milionë euro. Ligji për rivlerësimin e pasurisë së paluajtshme ka hyrë në fuqi në 1 janar 2020, dhe afati përfundimtar për t’u mbyllur është 31 dhjetori 2021.
Discussion about this post