Në një komunikim online, ministrja për Europën dhe Punët e Jashtme, Olta Xhaçka deklaroi se Shqipëria vijon të përmbushë të gjitha kriteret për zhvillimin e Konferencës së Parë Ndërqeveritare. Xhaçka u shpreh se raporti i Komisionit Europian, tregoi qartë se Shqipëria është në rrugën e duhur dhe përpjekjet e qeverisë për të luftuar korrupsionin kanë dhënë rezultatet e duhura.
“KE është i qartë ndërsa thotë se Shqipëria i ka përmbushur të gjitha kushtet për zhvillimin e Konferencës Ndërqeveritare. Raporti thekson se Gjykata Kushtetuese është bërë funskionale që prej dhjetorit të 2020-tës. Raporti gjithashtu thekson që rezultatet në Reformën në Drejtësi kanë vijuar. Arritjet në fakt janë provë e qartë e vullnetit të qeverisë për të luftuar korrupsionin dhe krimin” – është shprehur Xhaçka.
Më tej Xhaçka është shprehur se raporti vlerëson përmirësimin e shërbimeve publike, si dhe ka gjetje pozitive për ekonominë.
“Raporti njeh dhe vlerëson përmirësimin e shërbimeve publike, jemi të vetëdijshëm që në këtë drejtim ka ende punë për të bërë. Por ky raport është konfirmim i punë së madhe që është bërë. Raporti përmban gjetje pozitive edhe për ekonominë për mënyrën se si është përballur qeveria nga dy goditje që pësoi edhe nga pandemia dhe nga tërmeti. Veprimet që ndërmori qeveria për të mbështetur bizneset. ishin të shpejta dhe të përshtatshme”- tha Xhaçka.
Ditën e sotme Komisioni Europian nxorri progres raportin, i cili shprehte shqetësime për korrupsionin në vend, për paketën anti-shpifje, si dhe nxitjen e SPAK-ut për të vepruar më shumë.
