Deputeti i PD-së, Helidon Bushati nuk i ka kursyer akuzat për deputetin socialist në Shkodër, Benet Becin pasi ky i fundit prezantoi një ditë më parë projektin për Unazën e Alpeve, që është rruga e Dukagjinit apo aksi Prekal-Lotaj-Ndërlysaj.
Me një postim në Facebook, Bushati shkruan se Beci po bën fushatë dhe se po premton atë që të demokratët tentuan ta bëjnë në vitin 2013.
Sipas Bushatit, në fund të mandatit, PD miratoi fondin prej 5 miliardë lekësh dhe ishte gati nisja e punës për aksin Prekal-Kir.
“Deputeti i rilindjes për Shkodrën paska shpallur dje si arritje të madhe se janë duke biseduar rreth një projekti infrastrukture, në atë që njihet si Unaza e Alpeve. Çdo investim në zonë do të ishte i mirëpritur dhe unë i pari do ta përshëndesja. Dua vetëm të ndajmë punën nga propaganda. Shihni çfarë diference ka deputeti i rilindjes sot, me veten e tij në vitin 2013. Dhe këtu del edhe dallimi i dy kohëve. Në fund të qeverisjes së demokratëve u miratua fondi prej 5 miliardë lekësh dhe ishte gati nisja e punës për aksin Prekal-Kir (Komuna Pult).
Deputeti i rilindjes e mban mend mirë se përveçse dëshmitar, ishte edhe i përfshirë në këtë projekt si drejtues i FSHZH. Sapo erdhi Edi Rama në pushtet, e mori atë buxhet, dhe e dërgoi në Korçë. Ky ishte pra vullneti i rilindjes për qarkun e Shkodrës. Sot, i njëjti na e hedh si realizim premtimi e si vëmendje, një gjë që është në fazën e diskutimit. Po 8 vitet e humbura? Po për këto kush mban përgjegjësi? Mund të kalohet një ditë më propagandë, ndoshta dhe një javë. Po faktet janë aty dhe s’të lënë të shkosh larg”, shkruan Bushati.
