Prokuroria e Tiranës ka pushuar hetimet për vdekjen e Lear Kurtit. Sipas prokurorisë ekspertiza mjeko-ligjore ka përcaktuar se vdekja e 32-vjeçarit ka ardhur për shkak të mbidozës.
Tashmë dosja është dorëzuar në gjykatë dhe pritet që kjo e fundit të vendosë nëse do pranojë apo jo kërkesën e prokurorisë.
Kujtojmë se Lear Kurti ndërroi jetë mbrëmjen e 19 tetorit në zonën e “Don Boskos”. Ai nuk iu bind urdhrit të forcave të policisë për ndalim dhe më pas u shoqërua në komisariat me furgon. Pak orë më vonë ai ndërroi jetë.
Më pas u zbulua se në stomakun e të riut u gjet një qese me lëndë narkotike. Nga rezultatet paraprake të autopsisë rezultoi se substanca e gjetur në stomakun e të riut ishte lëndë narkotike e llojit kokainë.
Lear Kurti po ecte në këmbë mesnatën e 19 tetorit kur u konstatua nga një patrullë policie që i kërkoi të ndalojë.
Por viktima u largua me vrap duke u ndjekur nga policia e cila e neutralizoi në një rrugicë ku ai shfaqi problemet e para shëndetësore.
30 minuta më vonë gjendja e tij u përkeqësua dhe nga komisariati i riu u transportua në spital ku dhe humbi jetën pa mbërritur ende. Është pikërisht ky moment i dyshimtë që futi në përplasje një sërë institucionesh përfshirë edhe Spitalin e Traumës, mjekët e të cilit hodhën poshtë faktin që pacienti që çoi policia në spital të kishte shenja jete.
Ata u morën në pyetje nga prokuroria dhe pranuan se kishin bërë gjithçka mundën që ta kthenin në jetë të riun, por nuk ia kishin dalë. Prokuroria ende nuk i ka dhënë përgjigje një morie pikëpyetjeve në lidhje me atë ngjarje të rëndë, një prej të cilave ishte edhe fakti se si nuk shkoi ambulanca deri te Komisariati nr. 3 kur e kishte thirrur policia. Megjithatë, pavarësisht kësaj ekspertize të publikuar nga Prokuroria e Tiranës, ngjarja ku humbi jetën Lear Kurti mbart ende mister.
Discussion about this post