Pak muaj para zgjedhjeve parlamentare, Enti Rregullator i Energjisë Elektrike (ERE) ka ulur me një 1 lekë për kWh çmimin e energjisë elektrike për abonentët familjarë.
Sipas vendimit, çmimi i energjisë elektrike shkon në 10.2 lekë për kWh me TVSH për ata që konsumojnë më pak se 700 kWh në muaj, për periudhën 1 shkurt 2025 – 31 dhjetor 2025. Vendimi është marrë me vendim unanim gjatë mbledhjes së Bordit të Entit Rregullator të Energjisë Elektrike gjatë ditës së sotme, ku u shqyrtua propozimi i qeverisë për uljen e çmimit të energjisë për abonentët familjarë.
Aktualisht, çmimi i energjisë elektrike për abonentët familjarë është 9.5 lekë për kWh pa TVSH. Pra çmimi i energjisë elektrike ulet me 1 lek, kështu që me TVSH do të paguajnë 10.2 lekë nga 11.4 lekë aktualisht.
Kush konsumon më shumë se 700 kWh energji elektrike në muaj do të vazhdojë të paguajë 9.5 lekë për çdo kWh që bashkë me TVSH shkon në 11.4 lekë.
Ulja e çmimit do të prekë vetëm kategorinë e konsumatorëve familjarë, duke përjashtuar kategoritë e tjera si bizneset, institucionet buxhetore dhe jobuxhetore. Ndryshime nuk do të ketë as për furrat e bukës.
Vendimmarrja e qeverisë vjen para zgjedhjeve të ardhshme parlamentare, që do të mbahen më 11 Maj 2025 dhe është parë gjerësisht si një lëvizje e pandershme për të ndikuar te zgjedhësit.
Pas mbledhje së ERE-s, kryeministri Edi Rama doli në një konferencë për mediat dhe propagandoi uljen e çmimit me 1 lekë për KWh si një “ULJE HISTORIKE E ÇMIMIT TË ENERGJISË”.
“Falë transformimit epokal të sektorit, rritjes së kapaciteteve prodhuese dhe menaxheriale të tij, si edhe vullnetit tonë për të ndarë me qytetarët çdo fryt të reformave e të rritjes ekonomike, çmimi i energjisë elektrike do të ulet për herë të parë në 35 vjetët e fundit, për të gjithë konsumatorët në fashën deri 700K”, u shpreh Rama në konferencën krah ministres së Energjisë Balluku.
Ngjashëm, qeveria veproi edhe me bonueset për pensionistët, teksa e premtoi këstin e radhës fill para zgjedhjeve të Majit. Vendimi u cilësua nga opozita si “karamele elektorale”, ashtu si edhe nisma e marrë në fundin e vitit 2024 nga mazhoranca për faljen e penaliteteve për ndërtimet pa leje.
Praktika të tilla janë nënvizuar edhe raportet ODIR pas zgjedhjeve si një praktikë jo e ndershme e qeverisë dhe në shkelje të Kodit Zgjedhor.
Lexo edhe:
Ulja minimale e çmimit të energjisë para zgjedhjeve, Bardhi: Rama vijon talljen me shqiptarët
Çmimi i energjisë, Berisha: Memorja e Edi Ramës është një mashtrim i plotë
Discussion about this post