Socialistët në Këshillin e Mandateve në Kuvend nuk pranuan të japin votat mbi propozimin e demokratëve që çdo deputet të deklarojë nëse ka përdorur aplikacionet si “Sky” dhe “EnchroChat”, që shfrytëzoheshin për komunikime mes grupeve kriminale.
Këshilli i Mandateve shqyrtoi këtë të premte kërkesën e demokratëve që në rregulloren e Kuvendit të përfshihet vetëdeklarimi i çdo deputeti nëse kanë përdorur apo jo aplikacionet “Sky” dhe “EnchroChat”. Propozimi erdhi nga kreu i grupit parlamentar të PD, Gazmend Bardhi, sipas të cilit, ky vetëdeklarim do të sjellë në Parlament më shumë transparencë dhe integritet.
“Është turp t’i kërkosh policit me pagë 600 mijë lekë, që është roje, që deklaron nëse përdor Sky ECC, ndërkohë që ata që ia kërkojnë kanë përdorur Sky ECC. E ne këtu themi ka implikime ligjore, transparenca. Asnjë implikim ligjor, veç vullnetit për t’ia fshehur publikut se kush është ajo pakicë që ka përdorur këtë aplikacion për të komunikuar me krimin e organizuar”, tha Bardhi.
Nga ana tjetër, socialistët arsyetuan se propozimi kishte probleme ligjore mbi zbatueshmërinë, ndaj kërkuan që të ngrihet një grup pune që ta shqyrtojë këtë çështje.
Bledi Çuçi u shpreh: “Kjo ka cene juridike sepse mund të goditet nga Gjykata Kushtetuese. Nëse duam të bëjmë një gjë për integritetin, hajde ta bëjmë tamam, por jo të bëjmë lojën e radhës. Unë nuk e bëj lojën e radhës”.
Në momentin për të marrë një vendim, mazhoranca nuk pranoi të bëhej pjesë e votimit, duke bërë që propozimi i Bardhit të binte për mungesë kuorumi.
Ndërkohë, më herët, palët kishin rënë dakord që çështjen e papajtueshmërisë së mandatit të deputetit Vullnet Sinaj, të pretenduar nga opozita, ta kalojnë për votim në seancë plenare.
Discussion about this post