“Shqipëria tjetër”, aktivisti i protestës Andi Tepelena flet për partinë e re: Po ngrihet Asamblea…

Në vijim të protestave që po zhvillohen në vend, Andi Tepelena ka deklaruar se, sipas tij, lëvizja qytetare ka arritur të përballojë përpjekjet për diskreditim në rrjetet sociale dhe nga struktura të organizuara politike.

Tepelena theksoi se protestuesit bashkohen rreth kërkesës për largimin e qeverisë dhe një ndryshim të thellë të sistemit politik.

Sipas tij, partitë politike duhet të hyjnë në një fazë të re riformatimi, përndryshe “do të përfundojnë në koshin e historisë”.

“Regjimi ka aktivizuar një ushtri me patronazhistë që tentojnë të bëjnë pis, por ne e kemi fituar këtë betejë sepse vetë qytetarët dhe influencerat janë një media më vete që po tejkalon çdo censurë.
Ne na bashkon fakti që të gjithë duam largimin e qeverisë dhe jemi anti kast, për të çliruar një sistem politik, duhet të nisë një epokë e re ku partitë politike kanë shansin e madh të riformohen, ndryshe do të përfundojnë në koshin e historisë. Mbase mund të nisë një lëvizje e re politike që mund të quhet “Shqipëria e re” ose “Shqipëria tjetër” që mund të ndodhë pas reformës zgjedhore”, tha ai.

Sipas Tepelenës, protesta është zhvilluar pa një strukturë të centralizuar apo hierarki drejtuese, duke e cilësuar atë si një lëvizje horizontale. Ai tha gjithashtu se çdo ditë merren qindra mesazhe dhe propozime nga diaspora shqiptare, e cila, sipas tij, po shpreh interes për të kontribuar me ide dhe forma organizimi.

“Protestat kanë marrë përmasa mbarëkombëtare, ku artikulohen problemet që vendi ka, të shprehura nga të gjitha shtresat e shoqërisë.

Kjo është një revoltë popullore, ku shkëndia ishte Zvërneci. Kjo revoltë po shpreh të gjithë pakënaqësinë popullore.

Kjo revoltë është unikale, sepse ka nisur nga një revoltë horizontale pa një hierarki që shërben si regji qendrore.

Marrim çdo ditë qindra kërkesa nga diaspora që dua të kontribuojnë edhe me ide. Sot nuk janë partitë të parët, por qytetarët.

Protesta po ecën në disa trase, protesta dhe revolta përballë Kryeministrisë që do të jetë çdo ditë, po ngrihet paralelisht një Asamble përfaqësuese qytetare, një nisme epa centralizuar. Kjo do të ketë edhe një këshill të vetën për të marrë vendime për vijimësinë e protestës,. Pra ka dy rrugë që po vijohen. Ka disa platforma dhe ide që kanë ardhur, sidomos edhe nga diaspora, për një komunikim dhe vendimmarrje online për shembull”, tha ai.