Deputeti i Partisë Demokratike, Enkelejd Alibeaj komentoi protestën e 6 dhjetorit që është organizuar nga opozita ditën që do të mbahet edhe Samiti i Bashkimit Europian dhe liderëve të Ballkanit Perëndimor në Shqipëri.
I ftuar në studion e “Debat”, Alibeaj tha se nuk do të merrte pjesë në protestën e 6 dhjetorit.
“Jo. Nuk jam kundër protestave, por protestat duhet të jenë të tilla që të sjellin një produkt në të mirë të qytetarëve. Deputetët kanë mjete të tjera për të qenë më efikas për shqiptarët, me një luftë të sinqertë në Parlament, dhe pasi i kanë ezauruar këto mjete, duhet të nisin protestat. Ka çështje të mëdha ku mund të bëhet luftë e madhe në Parlament,”-u shpreh Alibeaj.
Po ashtu, ndër të tjera Alibeaj foli edhe për ish-kryedemokratin Lulzim Basha për të cilin u shpreh se u dorëhoq që të tërhiqej edhe Sali Berisha.
“Basha është anëtar i grupit parlamentar të PD-së dhe unë kam komunikim me të gjithë anëtarët. Basha ka dhënë dorëheqjen, me një arsye politike fisnike besoj unë. Ai tha se po largohet për të hequr problemin në parti. Për të njëjtën arsye duhet të largohej edhe zoti Berisha, por nuk është larguar.
Nuk ka ndodhur asgjë që të mund të ndryshonte qëndrimin tonë apo të Basha. Nëse i kthehemi memories, shkaku i pretenduar nga Berisha në atë kohë ishte dualizmi. Basha u dorëhoq që të dorëhiqej edhe Berisha,”- shtoi Alibeaj.
Discussion about this post