Deputetë të Partisë Demokratike, që konsiderohen si mbështetës të grupimeve Berisha-Bardhi, protestuan sot në sallën e Kuvendit duke bllokuar kështu nisjen e seancës parlamentare.
Sjellja e ligjvënësve demokratë është kritikuar nga socialistët, që nxituan të paraqesin një kërkesë për të dënuar 26 deputetë demokratë.
Por duket se deputetët që njohin si kryetar të Grupit Parlamentar Gazment Bardhin, kanë kundër edhe kolegët e tyre, që ndodhen në krah të Lulzim Bashës.
Arbi Agalliu një nga deputetet e Partisë Demokratike ka kritikuar kolegët e tij demokratë, të cilët sot bllokuan Kuvendin dhe nuk lejuan që të zhvillohej seanca.
Me anë të një postimi në rrjetin social, Agalliu thotë se “dhuna dhe bojkoti nuk mund të jenë alternativë për shqiptarët në vitin 2023”.
Sipas tij, bojkoti i institucioneve dhe bllokimi i aktivitetit parlamentar nuk është ajo çfarë shqiptarët presin, ndërsa thekson se “opozita e ka vendin në parlament, në komisionet parlamentare dhe kudo ku ligji dhe kushtetuta lejon”.
Sipas tij nga kjo sjellje e Berishës përfiton vetëm Edi Rama dhe qeveria e tij.
“Demokracia shqiptare është goditur sa herë ka patur bojkot dhe bllokim.
Ajo që i duhet Shqipërisë sot nuk është bojkoti por fryma dhe alternativa.
Fryma krijohet kur je i ndershëm dhe me moral në aksionin politik. Fatkeqësisht, nuk mund të luftosh korrupsionin me njerëz të korruptuar.
Aq më tepër të pretendosh dhe të kërkosh me dhunë të të pranojë një popull i tërë, i cili të refuzon me votë në mënyrë të vazhdueshme.
Nga kjo sjellje e Berishës dhe deputetëve të tij përfiton vetëm Edi Rama dhe qeveria e korruptuar”, shkruan Agalliu.
Discussion about this post