Ish-kryeministri Sali Berisha e ka konsideruar si një uragan protestën e djeshme për rritjen e çmimeve në Tiranë, ku gjeti rastin të sulmojë qeverinë për mos marrjen e masave.
Nga hyrja e Kuvendit, Berisha tha para gazetarëve se rritja e çmimeve në vend nuk krahasohet me asnjë tjetër, madje as me vendet e rajonit si Maqedonia apo Kosova ku qeveria po ndihmon me uljen e taksave.
“Përshëndetje të përzemërt për të gjithë ata protestues në Tiranë, Shkodër, Tepelenë, Durrës dhe Korçë. Ndërgjegjia e qytetarëve është zgjuar më shumë se kurrë, po merr protesta në masën e një uragani, kauza e saj është më e drejta dhe që lidhet me ekzistencën e qytetarëve dhe familjeve shqiptare të cilat korrupsion i kësaj qeverie i ka shtyrë drejt niveleve të frikshme të varfërisë. Çmimet e papërballueshme të ushqimeve dhe naftës, janë padiskutim në backgroundin e një lufte që zhvillohet në Evropë, po nuk krahasohen me asnjë vend tjetër. Maqedonia hoqi TVSH nga të gjitha ushqimet, ngriu fitimin për bukën dhe produkte të tjera për një afat të caktuar. Caktoi 15 milionë euro Kosova për fermerët që të mbjellin sa më shumë drithëra”, tha Berisha.
Gjithashtu, Berisha komentoi edhe zhvillimet brenda PD pas humbjes tronditëse në zgjedhjet e 6 marsit, ku tha se është gati të presë deputetët që po largohen nga Basha në lëvizjen e tij.
Discussion about this post