Protesta e së hënës, Noka thirrje socialistëve: Bashkohuni me ne, nuk është betejë për Berishën

Flamur Noka, me cilësinë e Sekretarit të Përgjithshëm ka drejtuar mbledhjen e Këshillit Kombëtar të PD-së së drejtuar nga Sali Berisha, ku njoftoi nisjen e protestave pasditen e së hënës, përpara Parlamentit.

Noka tha se PD, pavarësisht se çfarë do të bëjë dhe çfarë përpiqet të bëjë Edi Rama dhe regjimi do të ngadhënjejë mbi këtë regjim dhe ne do dalim për ta gjunjëzuar dhe rrëzuar atë.

“Dy janë goditjet më të rënda të një regjimi kundër një partie politike: Nxjerrja jashtë ligjit dhe, burgosja politike ose eleminimi i liderit. Këtë po bën ekzaktësisht Edi Rama dhe regjimi i tij. Ka nisur që me agjentin e dënuar të FBI-së, skema për eleminimin e Partisë Demokratike dhe shpalljen non grata të Sali Berishës, dhe po e përmbyll me SKAP-in e kapur, duke kërkuar burgosjen e liderit historik.

Praktikisht, ai kërkon që PD reale të nxirret jashtë ligjit, dhe në vend të saj të jetë një parti që vetëm logon ka të partisë së parë anti-komuniste në Shqipëri, ndërsa gjithcka tjetër e ka të Bashkimeve Profesionale të Partisë së Punës”, tha Noka.

Ai u shpreh se asnjë interes publik nuk e toleron asgjësimin e opozitës së një vendi.

“Ne demokratët u themi socialistëve se beteja për të burgosur Sali Berishën është përpjekja për të instaluar një njeri në pushtet. Kur të mbarojë punë me ne, ai do t’u kthehet ju, të vetëve, sic bëri Enver Hoxha.

Ne nuk do ta lejojmë dhe ju ftojmë edhe ju të na bashkoheni!

Kjo nuk është betejë për Sali Berishën dhe Partinë Demokratike, por për Shqipërinë si vend normal, demokratik, pluralist, euro-atlantik.

Të hënën ne dalim në protestë te Parlamenti që Rama ka bllokuar, sepse ai është kuvendi i përfaqësuesve të popullit opozitar, të popullit shqiptar, jo të Lindës së radhës.

Sonte, të hënën dhe cdo ditë, ne dalim te Rruga e Shpresës për t’i thënë JO burgosjeve politike, pavarësisht nëse ato janë për Sali Berishën, Fredi Belerin apo Arben Ahmetajn. Ne dalim kundër porosive dhe pritave që zbaton SPAK-u për hatër të Edi Ramës.

Të hënën ne mblidhemi për t’i thënë shqiptarëve dhe botës se, pse Amerika e dënon McGonigalin për tradhti dhe korrupsion, por SPAK, kantautorin, bashkëautorin dhe bashkëfajtorin e agjentit të FBI, e lejon të dalë e të shesë dokrra, si luftëtar i anti-korrupsionit?!

Të hënën ne dalim për t’u thënë, për të njëmijtën herë, shqiptarëve dhe botës se, Edi Rama dhe Erion Veliaj janë pronarë faktikë të inceneratorëve dhe, se duhen hetuar si të tillë”, tha Noka.