Molotovët drejt fasadës së bashkisë së Tiranës u shtuan gjatë protestës së kësaj marte. Ashtu si në tubimet e mëparshme, u kërkua dorëheqja dhe arrestimi i Erion Veliajt.
Protesta e nisur në 11:00 zgjati gati 1 orë e 30 minuta dhe ishte e teta e zhvilluar që pas arrestimit të drejtorëve të Erion Veliajt lidhur me procedimin penal të njohur si “dosja 5D”. Organizimi ishte i njëjtë si në ato paraardhëse. Me pankarta në duar, thirrje dhe fjalime nga podiumi i krijuar enkas, u lëshuan mesazhe për të zbardhur deri në fund aferat në bashki dhe vënien e Veliajt para përgjegjësisë ligjore.
Për opozitën, që ka organizuar protestat, Erion Veliaj është “koka e bandës së drejtorëve hajdutë” dhe “pronari faktik i inceneratorit të Tiranës”. Për këtë, ata kërkojnë dorëheqjen e Veliaj.
Ky i fundit ndërkohë, pretendon se nuk ka pasur dijeni për aferat e vartësve të tij.
Hetimet për inceneratorin e Tiranës janë drejt fundit, ndërsa ende nuk ka akuzë penale ndaj Veliajt, i cili ka një rol kyç në lidhjen e kontratës me koncesionarin e Sharrës, që ka rezultuar një aferë korruptive.
Akuzë nuk ka as për dosjen “5D”, edhe pse kompania që sipas SPAK ishte “de facto” nën pronësi të drejtorëve të bashkisë – Redi Molla dhe Mariglen Qato, ka marrë tendera në mënyrë të jashtëligjshme nga bashkia e Tiranës dhe institucionet nën varësi.
Opozita këmbëngul se kryebashkiaku ka përgjegjësi ligjore për të dyja çështjet dhe ka paralajmëruar se protestat do të jenë të vazhdueshme deri në dorëheqjen e Veliajt dhe vënien e tij në bankën e të akuzuarve të drejtësisë. Tubimi i radhës është lajmëruar të martën e ardhshme, në 11:00.
Discussion about this post