Në një intervistë për mediat, ish-drejtuesi i lartë i policisë së shtetit, Shemsi Prençi ka folur mbi protestën e zhvilluar ditën e sotme në Dibër kundër ndërtimit të hidrocentralit të Skavicës. Prençi tha se mori pjesë në protestë nën funksionin e nënkryetarit të Shoqatës për Mbrojtjen e Luginës së Drinit të Zi. Ndërsa theksoi se interesat ishin të kundërta me ndërtimin e hidrocentralit të Skavicës i cili pritet të përmbysë rreth 35 fshatra të këtij rrethi.
“Në fakt që prej 20 vitesh, jam në funksionin e nënkryetarit të Shoqatës për Mbrojtjen e Luginës së Drinit të Zi. Ende pa e ditur se një ditë të bukur qeveria shqiptare do të shpaloste një projekt të një hidrocentrali. Para dy vitesh, qeveria ka lançuar një projekt për Skavicës ndërsa interesat e popullit të Dibrës janë që kjo gjë të mos realizohet për disa arsye. Së pari Dibra ka një histori ndër shekuj në lufta me turqit dhe me serbët prej vitesh dhe po të mos ishte Dibra deri në Tiranë do flitej sllavisht. Jo për t’i dhënë merita por sepse kështu e thotë historia. Historia e Dibrës është shumë më e lashtë. Përpos të tjerave, lugina e Drinit të Zi ka një pasuri të jashtëzakonshme në minerale dhe një pasuri të pashtervshme për frutikulturën në Shqipëri, ku për 50 vite furnizoi gjithë vendin dhe Ballkanin. Në këto kushte interesat për ta patur Dibrën ashtu siç është natyrore, është më e madhe se për ta përmbytur dhe për ta zhdukur trevën e kastriotëve. Në një shoqëri të civilizuar dhe demokratike duhet të respektohet kushtetuta përsa i përket pronave. Nuk ka asnjë lloj shkëmbimi idesh për këtë projekt, janë të gjitha slogane dhe reklama të gënjeshtërta sepse nuk ka pasur asnjë komunikim qoftë edhe me 10 banorë nga 35 fshatra të Dibrës që nesër do të jenë nën ujë” – u shpreh Prençi.
Discussion about this post