Partia Demokratike do zhvillojë ditën e sotme protestën e radhës para parlamentit, para nisjes së seancës së radhës plenare në orën 10:00.
Policia ka marrë masat e para për mbarëvajtjen e kësaj proteste dhe shmangien e ndonjë incidenti të mundshëm.
Dhjetëra efektivë policie janë vendosur në perimetrin për rreth parlamentit në orët e para të mëngjesit të sotëm. Protesta pritet të nisë para orës 10:00, kur një grup protestuesish do të nisen nga selia blu për të marshuar drejt kuvendit me në krye drejtuesin e Partisë Demokratike Sali Berisha. Protestës pritet t’i bashkohet dhe kryetari i ‘Partisë së Lirisë’, Ilir Meta.
Opozita i ka bërë thirrje qytetarëve që të bashkohen paraditen e sotme në orën 10:00 në një protestë para Kuvendit, aty ku janë përjashtuar nga seancat 23 deputetë të saj.
Kryetari i PD-së, Sali Berisha, një ditë më parë theksoi se përjashtimi i tyre është bërë me urdhër të Edi Ramës që, sipas tij, kërkon të pengojë me çdo kusht mocionin me debat dhe ngritjen e komisionit hetimor për aferën me McGonigal.
Discussion about this post