Mbrëmjen e sotme pritet të protestohet në Himarë kundër mbajtjes në paraburgim të kryebashkiakut të zgjedhur Fredi Beleri, i cili në 14 maj arriti të fitojë mandatin përballë socialistit Jorgo Goro.
Beleri mbështetej në zgjedhje nga koalicioni “Bashkë Fitojmë”, ndërsa dy ditë para zgjedhjeve ai u arrestua nga Policia me akuzën e blerjes së votave.
Nga ky moment Beleri ndodhet në paraburgim, ndërsa rrezikon humbjen e mandatit për shkak se nuk u lejua të kryejë betimin para Këshillit Bashkiak, ashtu sikundër parashikon ligji.
Në protestën e sotme në Himarë pritet të jetë prezent edhe kryebashkiaku i Athinës, Kostas Bakoyannis.
Sipas gazetës Kathimerini, ai do të shprehë mbështetjen e tij për kryebashkiakun e zgjedhur të Himarës, Fredi Beleri, i cili është në qeli që prej majit me akuzën me blerjes së votave.
51-vjeçari i ka mohuar akuzat, por kjo ngjarje ka shkaktuar tensione mes dy vendeve fqinje.
Gazeta shkruan se Athina ka kërcënuar se nëse Beleri nuk do të lirohet dhe nuk do lejohet të marrë postin e fituar në zgjedhje, Greqia do të bllokojë negociatat e Shqipërisë me Bashkimin Europian.
Bakoyannis pritet të flasë në një tubim të minoritarëve grekë në Himarë në mbrëmje.
Discussion about this post