Protestat në Gizë vazhdojnë prej dy javësh, ku banorët e zonës janë përplasur disa herë me punonjësit e bashkisë Patos, ndërsa së fundmi kanë ngritur zërin edhe përgjegjës e drejtorë të shërbimeve publike për shkollën që do të shembet dhe ka lënë nxënësit pa mësim.
Pasi dolën nga ambientet e Bashkisë, ku patën debate me punonjësit, ata janë revoltuar edhe më shumë që kryetarja nuk u paraqit. Në prononcim për mediat Vangjel Nushi drejtor i shërbimit publik ka thënë se do vazhdojnë protestën pavarësisht se janë kërcënuar me vendin e punës.
“Shkollën e konstatuan që në gusht që kishte plasaritje dhe fëmijët kanë bërë një javë mësim, atë javë si i lanë fëmijët të zhvillojnë mësim a nuk ishte e rrezikshme për këtë javë kjo. Ata duhet të vinin e ta sqaronin çështjen, jo të vijnë natën e t’iu bëjnë presion njerëzve që do ju heqim nga puna nëse reagoni. Nëse kanë ndërmend ta riparojnë të vijnë, jo të zvarriten”, u shpreh zyrtari.
Ndërsa një tjetër përgjegjëse e shërbimit public ka thënë se, ata kanë punësuar një inxhinier privat, i cili ka bërë ekspertizën e shkollës dhe e ka nxjerrë pa rrezik. Sipas saj Bashkia kërkon të shmanget për interesa private, edhe pse të gjitha familjet aty janë zotuar të paguajnë për rikonstruktimin e shkollës.
“Kryetarja e Bashkisë nuk del të flasë me ne, e dimë që ndodhet këtu dhe nuk del sepse bie në kontradiktë me fjalët që ka thënë kur e intervistuat ju më përpara me veprimet që bën. Por, ne sërish këtu jemi nesër, do protestojmë çdo ditë. Ne kemi marrë një inxhinier privat e ka inspektuar shkollën dhe ka dalë në konkluzionin që shkolla nuk është në rrezik. Ne mund të investojmë dhe vetë për ta riparuar shkollën nëse qeveria nuk ka fonde”, u shpreh ajo.
Zyrtarët thanë se do vazhdojnë çdo ditë të protestojnë dhe se nuk e tolerojnë faktin që kryetarja e Bashkisë i shmanget përgjegjësive.
E.H/ gijotian.com
