Ashtu sikur paralajmëruan dy ditë më parë, për disa minuta tregtarët e vegjël dhe të mesëm në Tiranë ulën qepenat në shenjë proteste ndaj vështirësive, me të cilat po përballen sidomos nga kostot shtesë të fiskalizimit dhe rritjes së çmimit të karburanteve.
Përmes kësaj proteste ata kërkojnë nga shteti më shumë mbështetje dhe subvencionim pasi po shkojnë drejt falimentimit. Por, ajo që ra në sy është se bizneset nuk ishin të gjithë në një menim ditën e stome, pasi disa prej tyre vazhduan punën normalisht, pa marrë pjesë në grevë. Protesta nuk nisi në orarin e përcaktuar, në 10:00 ndërkohë që u desh të vinin përfaqësues nga Shoqata e Biznesit të Vogël e të Mesëm të nxisnin tregtarët në uljen e qepenave. Disa nga tregtarët thanë se nuk i ulën qepenat për shkak se protestat e tyre nuk i merr më askush për bazë, pasi për çdo gjë vendos qeveria dhe biznesi i madh. “I madhi nuk pyet, thotë ligjet i bëj unë. Kështu që kot, si mbyllur, si hapur ne e kemi njësoj”, tha një prej tyre.
Ndërsa, tregtarë të tjerë shpresojnë në dhënie e ndihmës nga shteti pasi ashtu sikundër pandemia dhe rritja periodike e çmimeve po i dërgon drejt falimentimit. “Jo e vështirë, por shumë e vështirë”, tha një tregtar tjetër. Sakaq, ata paralajmëruan përshkallëzim protestash nëse kërkesat e tyre nuk merren parasysh.
