Sali Berisha, gjatë fjalës në tubimin e përnatshëm poshtë banesës së tij, u bërë thirrje këtë të mërkurë banorëve të Tiranës që të premten të bashkohen në protestën kundër Erion Veliajt.
“Të bashkohemi të premten për fitoren e frymës evropiane, fitoren e shpirtit europian të qytetarëve shqiptarë”, tha Berisha.
“Të premten të flakim qelbësirën, kalbësirën e bashkisë për të flakur me radhë kalbësirat e tjera”, u shpreh lideri i opozitës, dy ditë para protestës së thirrur nga opozita para Bashkisë së Tiranës, për të kërkuar largimin e Erion Veliajt nga zyra e kryebashkiakut. “Duhet të shpëtojnë Shqipërinë. Kjo nuk bëhet pa sakrifica”, tha kryetari i PD-së.
Lideri i opozitës u shpreh gjatë se Erjon Veliaj ka vjedhur me drejtorët e tij 38 milionë euro. Berisha tha se nuk ka kryebashkiak kund në Europë, as në botë, që t’i thotë qytetarëve se “kam mbjellë 1 milion pemë vetëm për të vjedhur shumat e blerjes së 1 milion fidanëve”.
Berisha akuzoi kryebashkiakun e Tiranës se i ka dhënë firmës Fusha 58 tendera, që të gjitha me 98 përqind të fondit limit.
Kryedemokrati shtoi se, qeverisja e PD-së vetëm në 3 vitet e para, duke përdorur garën e hapur në tenderime, kurseu 500 milionë euro.
Sipas Berishës, këto para u përdorën më pas për të rritur pagat në administratë.
Discussion about this post