Ish-kryeministri, Sali Berisha, ka reaguar sot në lidhje me protestat e vazhdueshme të banorëve të Laprakës, që rrezikojnë t’iu prishen banesat nga punimet që po bëhen në Unazën e Madhe. Përmes një postimi në Facebook, Berisha tregon se një banor i asaj zone ka denoncuar rastin dhe i ka treguar se bashkia do të prishë 700 banesa dhe mbetën të pastreha rreth 2000 familje. Prandaj, Berisha iu bën thirrje qytetarëve të ngrihen në protesta dhe të mos e lejojnë këtë gjë.
“Për shushunjat e tyre Edvini dhe Lal plehu do prishin 700 shtëpi! Kreu i Meduzës dhe Lal Plehu për Oligarkët e tyre devijojnë Unazën dhe do prishin 700 shtëpi. Banorët akuzojnë pallatet e Doshit dhe oligarkëve të tjerë! Ju bej thirrje banoreve të ngrihen në protestë”, shkruan ai.
Madje, qytetari që i shkruan Berishës thotë se, po prishen banesat e tyre në mënyrë që të ndërtojë pallate Tom Doshi. Banorët e Laprakës kanë disa javë që çdo mbrëmje protestojnë kundër prishjes së banesave. Por, deri më tani asnjë reagim nuk ka ardhur nga bashkia.
