Protestat në selinë blu, shpërthen Alizoti: PD sot vdiq!

Deputeti i PD-së, Tomor Alizoti, ka reaguar në lidhje me protestën e sotme në selinë blu, duke e quajtur atë të turpshme. Alizoti nuk ishte as jashtë me Sali Berishën dhe as brenda selisë me Lulzim Bashën, por përmes një interviste televizive shprehu trishtim dhe keqardhje të madhe për situatën ku ndodhet partia më e madhe në opozitë. Sipas tij, PD sot vdiq  pasi është zhytur thellë në krizë.

“PD sot është në një krizë të tmerrshme morale. Çdo demokrat që e ka parë atë skenë sot, është që pas 30 vitesh shikoj policinë në PD. Partia jonë ka thënë se kjo është policia e krimit. Për mua prezenca e policisë në një parti të djathtë, do të thotë se partia ka “vdekur politikisht”. Për çfarë i duhet kryetarit aktual vula dhe godina? Për çfarë duhet beteja më? Nuk mund të përdorej gaz ndaj vartësve të vet. Kjo parti nuk ka prodhuar asnjë mendim dhe koncept dhe zotëria që është aktual në PD nuk ka fituar asnjë garë. Ku ka të ardhme PD-ja me këto figura. PD sot është në trishtimin më të madh. Opinioni që sot pa këto pamje është shokuar.

Kriza zgjidhet me negociata dhe jo, “do rri unë dhe vdiqa”. Një nga themeluesit e kësaj krize është edhe Berisha, këta janë të dy bashkëfajtorë, por asnjë nuk lëshoi pe. Të dy do të luftojnë të marrin sa më shumë demokratë. Shikoj zotërinë aktual që nuk e quaj as kryetar, është jashtë çdo lloj sfere, jashtë çdo koncepti politik”, u shpreh ai.

Të dy i cilëson fajtorë, por për Alizotin, Basha duhet të largohet, ndërsa Berisha të kontribuojë për demokratizimin e partisë. “Roja i selisë iku që të mos përfshihej në këtë turp. PD ka nevojë për dinjitet dhe alternativë. Berisha që kam dashur dhe dua duhet të kontribuojë për demokratizimin. Bashën nuk e kuptoj çfarë vazhdon dhe bën më aty. Berisha dhe Basha janë pjesë e problemit, duhet të zgjidhin krizën urgjentisht. Ky akt e fundosi Bashën sot përfundimisht në sytë e mi”, tha ai. Përplasja mes simpatizantëve të Berishës dhe atyre të Bashës ka qenë shumë e fortë sot, madje disa prej tyre kanë mbetur të lënduar dhe gjenden ne spital.