Ditën e sotme para Kryeministrisë po zhvillohet një protestë nga aktivistët që kundërshtojnë marrëveshjen e Shqipërisë dhe Italisë për pritjen e emigrantëve.
“Këta kanë bërë një mbiligjshmëri, aty ku ligjet nuk duhet të ekzistonin dhe mungojnë ligjet dhe dekretet ekzekutive për trajtimin e emigrantëve, për trajtimin e azilantëve dhe për trajtimin e apolitëve.
Dhe Evropa, qoftë me heshtjen, qoftë me dakordësinë e saj, po bën të ligjshme diçka të paligjshme.
Këta dy kryeministra kanë tentuar të forcojnë pushtetin e tyre jashtë, atë pushtet që brenda, Rama në Shqipëri dhe Meloni në Itali, po u dobësohet dhe u është dobësuar dita-ditës”,u shpreh një nga aktivistët.
Një protestë e njëjtë është mbajtur dje para portit të Shëngjinit nga aktivistë të shoqërisë civile nga Italia dhe Shqipëria kundër marrëveshjes Meloni-Rama.
Deri më tani, dy grupet me emigrantë të ardhur nga Italia nuk kanë qëndruar më shumë se 48 orë në Shqipëri, për shkak të vendimeve të Gjykatës italiane dhe problemeve me paditë e hapura deri në gjykatat europiane. Kryeministrja italiane Giorgia Meloni gjithsesi shprehet e vendosur t’i shkojë deri në fund paktit qeveritar me kryeministrin Edi Rama. Po ashtu mediat italiane shkruajnë se për qeverinë Meloni mënyra sesi po shkojnë procedurat dhe përplasja me drejtësinë për listën e vendeve të sigurta, është ‘më mirë’ që të përmbyllet me një përplasje midis Romës dhe Brukselit.
Reagimi i parë i qeverisë Meloni pas rastit të fundit të emigrantëve që u dërguan në Shqipëri dhe që “u detyruan” nga një vendim gjykate të kthehen në Itali, ishte i menjëhershëm teksa u shprehen të bindur se gjykatësit janë gabim.
Discussion about this post