Një përpjekje për të zhvilluar një protestë qytetare në Përrenjas përfundoi pa pjesëmarrje, pasi thirrjes për t’u mbledhur në shesh nuk iu përgjigj pothuajse askush. Në tubim u paraqit vetëm një qytetar, i cili ironizoi mungesën e banorëve duke deklaruar se “banorët këtu nuk kanë halle e probleme”.
Ai tha se kishte menduar t’i drejtohej me disa mesazhe kreut të pushtetit vendor, por mungesa e pjesëmarrësve e bëri të pamundur. Në vijim, qytetari falënderoi me ironi edhe ata që po e ndiqnin nga kafenetë përreth.
“Mirëmbrëma, mirë se keni ardhur. Në fakt s’keni ardhur po s’ka problem, erdhëm ne. Erdhëm t’ju përshëndesim, thamë që si gjithë Shqipërinë ta organizonim një protestë dhe këtu në Përrenjas. Unë jam bir i kësaj ane. Po me sa duket ju s’paskeni halle dhe probleme fare. Unë kisha bërë mend që t’i thosha ca fjalë Nuriut, po s’ja them dot se ju qenkeni të gjithë në punë.
Megjithatë ne ju falenderojmë shumë, që na shikoni dhe nga kafja kështu. Patjetër që do falenderojmë policinë e shtetit. Faleminderit shumë. Edhe diçka doja t’ju thoja. Nëse ndokush ju pyet, se pse, nga ishte Vilson Blloshmi apo Genc Leka apo Petrit Blloshmi, mos i tregoni që ishte nga kjo anë. Sepse ata do të dridhen në varr. Mos i tregoni se ata dhanë jetën për këtë anë. Ju faleminderit”, u shpreh qytetari.
Ndërkohë sot në Tiranë pritet të zhvillohet protesta e 16-të radhazi kundër qeverisë. Sipas tyre, tubimet e deritanishme kanë regjistruar pjesëmarrje të lartë dhe kanë shërbyer si pikënisje për protesta të ngjashme edhe jashtë vendit.
Manifestime janë zhvilluar në disa qytete evropiane ku jeton komuniteti shqiptar, si edhe në Shtetet e Bashkuara. Pjesëmarrësit kanë kërkuar largimin e kryeministrit Edi Rama dhe organizimin e zgjedhjeve të lira, duke e lidhur mobilizimin e tyre me zhvillimet politike në Shqipëri.
Organizatorët pretendojnë se vala e protestave po zgjerohet përtej kufijve të vendit dhe se pjesëmarrja e diasporës po kthehet në një element të rëndësishëm të presionit politik ndaj qeverisë.
Discussion about this post