Pas protestës së banorëve të pallatit nr.21 në lagjen nr.7 të qytetit, të cilët u mblodhën paraditen e kësaj të premteje në sheshin përpara bashkisë, kjo e fundit sqaron se në ç’pikë ka ngecur procesi për ringritjen e pallatit të shembur rreth 1 vit më parë.
Bashkia Durrës nënvizon se i gjithë procesi që po kryhet nga FSHZH, është në fazën e garës për përzgjedhjen e firmës fituese e më pas do të fillojë puna për rindërtimin e pallatit.
“Në lidhje me protestën e disa banorëve për pallatin e tyre nr.21 në lagjen 7, Bashkia e Durrësit sqaron se pallati i tyre është shembur dhe do të rindërtohet nga e para në të njëjtin vend. Ashtu siç kemi sqaruar banorët e pallatit i bëjmë me dije edhe të gjithë opinionit publik se i gjithë procesi që po kryhet nga FSHZH është në fazën e garës për përzgjedhjen e firmës fituese e më pas do të fillojë puna për rindërtimin e pallatit ku këta banorë do të përfitojnë apartamente të reja më të forta e më të sigurta se ato që kishin përpara tërmetit. Gjithashtu banorët e këtij pallati kanë marrë bonus qiraje dhe do të vazhdojnë ta përfitojnë këtë bonus derisa të hyjnë në banesat e tyre të reja” – thuhet në njoftimin e Bashkisë Durrës.
Kujtojmë që ditën e sotme që përkon me dy vjetorin e tërmetit tragjik të 2019-ës, banorët e lagjes nr.7 në Durrës kanë zgjedhur të protestojnë. Banorët e një pallati janë shfaqur para Bashkisë së Durrësit, me kërkesën për rindërtimin e pallatit të tyre, i cili pretendojnë se është dëmtuar nga tërmeti. Ata shprehen se kanë kërkuar vazhdimisht nga Bashkia e Durrësit që të zgjidhë problematikën e tyre, por ende nuk kanë parë asnjë nismë konkrete.
Discussion about this post