Protestuesit thirrje gjeneralit Wesley Clark në Nju Jork: Mos qëndroni në krah të Edi Ramës, ai është kriminel!

Një grup protestuesish shqiptarë në Nju-Jork kanë reaguar ndaj pranisë së kryeministrit Edi Rama në Shtetet e Bashkuara, duke i bërë thirrje gjeneralit amerikan Wesley Clark që të mos qëndrojë përkrah kreut të qeverisë shqiptare.

Në videot e publikuara nga protesta, dëgjohen thirrje drejtuar Clark-ut, ku protestuesit i kërkojnë të distancohet nga Rama.

“Mos qëndroni krah Edi Ramës, është kriminel”, dëgjohet një prej protestuesve t’i drejtohet gjeneralit amerikan.

Reagimi vjen gjatë qëndrimit të Ramës në Nju-Jork, ku ai ndodhet në kuadër të aktiviteteve të Asamblesë së Përgjithshme të Kombeve të Bashkuara.

Në videot e publikuara në rrjetet sociale, protestuesit shihen duke i hedhur vezë kryeministrit, ndërsa nga turma dëgjohen thirrje dhe epitete të rënda ndaj tij, mes tyre “mafia” dhe “kriminel”.

Në krah të Ramës ndodhej bashkëshortja e tij, Linda Rama, si dhe kreu i grupit parlamentar të Partisë Socialiste, Taulant Balla.

Ju rikujtojmë se Clark ishte komandant suprem i forcave aleate të NATO-s në Evropë dhe drejtoi fushatën ajrore të Aleancës kundër forcave të regjimit të Slobodan Millosheviçit. Ndërhyrja e NATO-s u zhvillua në kontekstin e konfliktit në Kosovë dhe krizës humanitare të shkaktuar nga represioni dhe dëbimet e popullsisë shqiptare të Kosovës.

Vetë Clark e ka përshkruar ndërhyrjen e NATO-s si një operacion që synonte mbrojtjen e popullsisë së Kosovës dhe ndalimin e represionit të regjimit të Millosheviçit.

Ndërkohë edhe kreu i grupit parlamentar të Partisë Socialiste, Taulant Balla, ka ndarë një fotografi me ish-Komandantin Suprem të Forcave Aleate të NATO-s në Evropë, gjeneralin Wesley Clark, duke shprehur mirënjohjen e tij për rolin që ai pati gjatë luftës së Kosovës në vitin 1999.

Në një postim në rrjetet sociale, Balla shkruan se Clark drejtoi fushatën e NATO-s në vitin 1999, të cilën ai e përshkruan si një ndërhyrje në mbrojtje të popullsisë së Kosovës dhe kundër represionit të regjimit të Slobodan Millosheviçit.

Balla shprehet gjithashtu mirënjohës ndaj Clark për deklarimet dhe dëshmitë e tij në Hagë, të cilat kanë qenë në mbështetje të komandantëve të UÇK-së.