Edhe sot vijon sot protesta kundër qeverisë dhe kryeministrit Edi Rama, e cila shënon ditën e 119-të të qëndresës qytetare.
Protesta e djeshme u zhvillua mes fjalimeve, pankartave dhe thirrjeve kundër qeverisë, ndërsa në përfundim të tubimit qytetarët nisën marshimin në rrugët e Tiranës. Gjatë marshimit u dëgjuan thirrje si “Rama në burg”, “Arrestoni Ramën dhe Ballukun” dhe “Dorëheqje”.
Në ditën e 118-të, protestuesit vijuan të shprehin kundërshtimin ndaj qeverisë përmes pankartave dhe sloganeve. Një prej tyre shkruante: “Me SHISH e me polici, nuk e mbani dot këtë tirani”, ndërsa një tjetër i drejtohej SPAK-ut për situatën në shëndetësi: “Shëndetësia ra, fiktiviteti u pa! SPAK mos rri, por vepro, hajdutët na i ndëshkoi.”
Gjatë protestës së djeshme, aktivistët dhe qytetarët përsëritën kërkesat për largimin e kryeministrit, ndërsa disa prej tyre ashpërsuan edhe më tej gjuhën e protestës. Aktivisti Edison Lika deklaroi se, sipas tij, “koha për dorëheqje ka mbaruar” dhe se thirrja e protestuesve do të jetë tashmë “Arrestoni Ramën”.
“Nga sot u themi kryeministrit se koha për dorëheqje ka mbaruar, nga sot do thërrasim arrestoni Ramën. Rama nuk do jetë aq me fat sa të mbyllë karrierën politike me dorëheqje, ai do ta mbyllë karrierën politike në pranga”, tha ai.
Edhe sot, qytetarët pritet të mblidhen sërish në shesh, ndërsa protesta vijon me fjalime, pankarta dhe marshim në rrugët e kryeqytetit.
Discussion about this post