Lefter Gështenja, deputet i PD-së, ka reaguar ndaj kërkesës që socialistët kanë depozituar në Kuvend, ku kërkojnë përjashtimin e 8 deputetëve të opozitës. Mes emrave që kërkohet përjashtimi nga seancat plenare është edhe ai i Lefter Gështenjës.
Socialistët e bazojnë kërkesën e tyre në sjelljen e deputetëve opozitarë që mbrëmjen e të enjtes bllokuan seancën, pasi nuk u pranua të votohej përbërja e Komisionit për Reformën Zgjedhore, për të cilin grupi Parlamentar i PD-së kishte propozuar emrat e rinj.
Në një reagim në rrjetet sociale, Gështenja thotë se “kur nuk ka më asnjë rrugë për t’iu shmangur përballjes me të vërtetën, Edi Rama në mënyrë qesharake përjashton opozitën nga Kuvendi”.
Sipas tij, me qëndrimin ndaj Kosovës, ai doli zbuluar se kush ia lëviz fijet.
“S’ka instrument, makinacion e as maronetë që e shpëton atë nga politika antikombëtare që po bën. Me qëndrimin ndaj Kosovës, ai doli zbuluar se kush ia lëviz fijet”, shkruan deputeti demokrat.
Discussion about this post