Kryetari i Grupit Parlamentar të PD-së, Alfred Rushaj edhe një herë ka theksuar se PD është e fokusuar tek shtyrja përpara e amendamenteve të propozuara nga partia që ai përfaqëson lidhur me vettingun e Politikanëve, Reformën Zgjedhore dhe për Reformën Territoriale.
“Axhenda jonë është e pavarur nga PS. Duhet të shtyjmë përpara prioritetet e shqiptarëve dhe të opozitës. Kanë të bëjnë me votën e lirë pra me reformën zgjedhore, reformën territoriale dhe vetingun e politikanëve”, tha Rushaj para gazetarëve.
I pyetur nëse do të ketë një akordim për kalim edhe të zgjatjes së Vettingut, gjë e cila është kërkuar nga Partia Socialiste, Rushaj ka thënë se kjo nuk është prioritet i PD. Sipas tij agjenda e PD-së është vetëm tek 3 amendamentet e propozuara prej tyre.
“Ne mendojmë që duhet të çojmë sa më përpara prioritetet tona. Vota preferenciale është e përfshirë. Të gjitha janë gjëra teknike siç edhe duhet të jenë e duhet të detajohen. Nuk shoh dualizëm, Basha është shprehur qartë se cili është qëndrimi i Partisë Demokratike për këtë punë. Kemi rezerva ndaj SPAK. Duke qenë një proces publik, prokurorët e SPAK do të duhet të ta bëjnë vendimmarrjen e tyre në bazë të një standardi dhe gjithçka të bëhet publike”, tha më tej kryetari i grupit parlamentar të Partisë Demokratike.
Alfred Rushaj ka nënvizuar edhe një herë se cilat janë prioritet e demokratëve duke përçuar më tej fjalën e liderit aktual Lulzim Basha, i cili një ditë më parë në një bashkëbisedim me gazetarët specifikoi se cili do të jetë aksioni i opozitës dhe synimet e saj.
gijotina.com
