Kreu i Partisë së Lirisë, Ilir Meta, nga studio e News24, tha se fakti që Arben Ahmetaj, zyrtari më i lartë i 10 viteve të fundit në qeverisjen e Edi Ramës, është në arrati, por ndihet edhe i kërcënuar, sikundër ai ka deklaruar, kjo nuk është diçka rastësore.
Meta tha se në të ardhmen do të zbardhet edhe deklarata e tij se ndihet i kërcënuar, por arratia e tij ngarkon me përgjegjësi Qeverinë dhe Edi Ramën.
“Largimi i Ahmetajt është akt i dënueshëm, duhej të ishte përballur me drejtësinë, pavarësisht se kemi një drejtësi me regji të orkestruar nga Edi Rama. Sot nuk kemi incinerator, por paratë e shqiptarëve po derdhen lumë te pronarët e inceneratorëve, atëherë kush e ka këtë fuqi, që janë miliona nga lekët e shqiptarëve që ikin jashtë?
Nuk e di Edi Rama që në Tiranë nuk ka incinerator? Drejtori i Investimeve në Kryeministri, ia ka dhënë me shkrim Edi Ramës dhe Engjëll Agaçit që kemi të bëjmë me paligjshmëri, sikundër janë kundërshtuar procedurat edhe nga ish-ministrat, përfshi edhe Shkëlqim Canin, por Edi Rama ka vijuar.
Atëherë ka njeri që beson deklaratat e Ramës që ai nuk dinte gjë dhe gjithçka e ka bërë Arben Ahmetaj?”, tha Meta.
Ai shtoi se afera e inceneratorëve po ecën me “shpejtësinë e kangurit”, ndërsa shtoi se me paratë e kësaj afere janë blerë zgjedhjet.
Meta tha se ndërkohë që afera vijon dhe pronarët e inceneratorëve marrin milionat, po vijon edhe vjedhja e parave të shqiptarëve.
Kreu i PL-së tha se për inceneratorin e Tiranës, bazuar te shkresat, Arben Ahmetaj ka kundërshtuar në fillim, pastaj ka marrë shkresat nga Këshillat Bashkiake lidhur me financimet, dhe më pas ka lejuar procedurat.
“Mendoj se Ahmetaj duhej të kundërshtonte, por do të ketë marrë garanci shumë të forta, ndaj dhe ka lejuar procedurat”, tha Meta. Sipas tij, i vetmi shqetësim i PL-së është sepse vijojnë pagesat kur nuk ka incenerator në Tiranë dhe pse bëjnë sikur nuk dinë gjë që nuk ka.
Discussion about this post