Ministri i Brendshëm Bledar Çuçi ka reaguar lidhur me ngjarjen e rëndë të ndodhur në Borizanë të Krujës ku të paktën 10 persona, mes të cilëve edhe dy vëllezërit e deputetit socialist Rrahman Rraja, dhe djali i tij, dhunuan barbarisht Bilbil dhe Jashar Maja.
Çuçi në reagimin e tij duket se ka thelluar skandalin e një dite më parë nga Policia, e cila në komunikatën zyrtare ka dhënë inicialet e disa personave si të përfshirë në konflikt, por pa përmendur një nga pjesëmarrësit, djalin e deputetit socialist.
Dhe po kështu, Policia e cila një ditë më parë kishte shoqëruar në komisariat njërin prej vëllezërve të deputetit, i cili pas dëshmisë u la sërisht i lirë, ndërsa sot u shpall në kërkim.
Sot në reagimin e tij, ministri i Brendshëm bën një deklaratë të përgjithshme, duke mos hyrë në detaje, duke shmangur përmendjen e emrave të personazheve të përfshirë në konflikt. Nuk dihet arsyeja sepse ministri i Brendshëm nuk përmend emrat e personazheve, aq më tepër kur tre prej atyre janë familjarë shumë të afërt të një prej deputetëve socialistë, parti ku bën pjesë edhe Bledi Çuçi.
Ministri bën të ditur se askush nuk është mbi ligjin, por të paktën nuk jep sqarime sepse deri më sot disa personazhe paskan qenë mbi ligjin, madje kanë pasur kurajon dhe guximin të dhunojnë dy qytetarë pse ata janë ankuar se nga shpërthimet në gurore i janë shkatërruar banesat.
“Të rënda e të papranueshme pamjet e dhunës në Krujë. Askush nuk është mbi ligjin dhe s’mund t’u shpëtojë përgjegjësive në asnjë rrethanë.
Policia e Shtetit ka ushtruar kontroll të imtësishëm në banesat e të dyshuarve, ka arrestuar 4 persona sot herët në mëngjes dhe po punon për kapjen sa më parë të 3 të tjerëve të përfshirë në ngjarje.
Çdo insinuatë tjetër s’ka lidhje me të vërtetën dhe me punën e Policisë së Shtetit për të çuar autorët përpara drejtësisë”, shkruan ministri
Policia e Shtetit arrestoi 4 persona dhe shpalli në kërkim 3 të tjerë për rrahjen brutale që iu bë dy kushërinjve Bilbil dhe Jashar Maja.
Për ngjarjen e ndodhur më shumë se 24 orë më parë në zonën e Thumanës policia shoqëroi në total 8 persona ndërsa në pranga ranë Ineidi Rraja, Eni Kullaj, Kujtim Përdaku dhe Andi Rraja.
Discussion about this post