Çmimet e larta të produkteve të shportës janë të papërballueshme për qytetarët e shqiptarë për shkak të të ardhurave të ulëta ndërsa rritja e çmimit të bukës e ka vështirësuar edhe më tej jetesën e tyre. Për këtë çështje kryeministri Rama u shpreh se ka ardhur si pasojë e taksës që vendosi Rusia, eksportuesja më e madhe e grurit.
“Nëse marrim rastin e çmimit të bukës, nuk është hera e parë që ka rritje, në 8 vjet ka pasur 3 herë rritje. Ka pasur rritje pasi furnizuesi më i madh i grurit është Rusia, e cila ka vendosur një taksë eksporti, kjo ka sjellë që çmimi të rritet kudo. Nuk e ndalon dot duke marrë masa nga lart poshtë, sepse lidhet me tregun. Edhe ulja e TVSH nuk ka sjellë edhe në vende të tjera rezultat në uljen e çmimit. Për fat të mirë ndikimi mund të ishte edhe më i madh ndërkohë që në kushtet që jemi janë fantazira që funksionojnë për ata që kanë dëshirë të fantazojnë”, tha Rama.
Pas tre vitesh, kryeministri Edi Rama ka pranuar dështimin me heqjen e tvsh-së 6% të bukës, duke u justifikuar që kjo ka ndodhur edhe në vendet e tjera.
“Kemi mësuar nga eksperienca që pavarësisht TVSH-së nuk pati ndryshim domethënës të çmimit. Kemi zgjedhur një sistem që nuk funksionon mbi bazën e qeverive por të tregut”, tha Rama.
Çmimi i bukës është rritur me 10 lekë që në datën 6 shtator. Pavarësisht reagimit të qytetarëve qeveria nuk ka marrë asnjë masë për të shmangur këtë rritje, por së fundmi është justifikuar me taksat që Rusia u ka vendosur eksportuesve të grurit.
