Prej dy ditësh punojnëset e një fasonerie në Kukës kanë ndërprerë punën në shenjë proteste ndaj punëdhënësve të tyre. Ata pretendojnë se nuk janë përmbushur detyrimet kontraktuale për pagën dhe kushtet nën të cilat punojnë. Një tjetër pikë e kontratës që është shkelur, sipas tyre është edhe vendosja e normës së punës mbi kapacitetet prodhuese për secilën punojnëse. Ndonëse kanë punuar mbi normën e parashikuar, sërish punojnëset e kësaj fasonerie kanë hasur vonesa në marrjen e pagës apo dhe ulje të rrogës. Disa nga punojnëset pretendojnë se nuk janë pajisur me kontratë pune.
Problemet e tyre i kanë adresuar në Agjencinë Kombëtare të Punësimit si ndërmjetës mes tyre dhe fasonerisë, pasi nga kompania ku punonin nuk morën një përgjigjie. Në një takim me përfaqeëinë e tyre, drejtori rajonal i kësaj agjencie në Kukës, Shani Kastrati, u shpreh se do të komunikojë me kompaninë, por edhe me Inspektoriatin Shtetëror të Punës, teksa theksoi se nuk është përgjegjësi e zyrës së punës, marrëdhënia mes punëmarrësit dhe punëdhënësit.
Punojnëset e fasonerisë bënë me dije se të enjten do të mbërrijnë në Kukës drejtuesit e kompanisë ku ato punojnë, për të diskutuar mosmarrëveshjet e krijuara dhe për të likujduar detyrimet ndaj tyre.
Discussion about this post