Gjatë prezantimit të drejtorit të ri të Policisë së Shtetit, kryeministri Edi Rama ka folur për herë të parë për përjetimet e ngjarjes së rëndë që tronditi Shqipërinë një muaj më parë, në Potam të Himarës, ku një ish-shef policie, Arjan Tase goditi për vdekje me skaf një vogëlushe në breg të detit. Rama tha se ka një ndjenjë revolte për faktin se shkelësi i cili u kthye në vrasës, nuk ishte një pushues i zakonshëm por një punonjës policie, që normalisht dhe si pushues duhet të ishte shembulli i respektit për ligjin dhe për rregullin.
“Nga goditja e një skafi në bregun e detit, sot kur vala e madhe e reagimeve mbi plagën e sapo hapur është fashitur, por dhe meqenëse jemi këtu në ministrinë e Brendshme në një moment ndryshimi në Policinë e Shtetit kam dëshirë të ndaj një reflektim me publikun dhe me ju që jeni gjithë skuadra drejtuese e ministrisë dhe policisë. Dhimbja për një jetë aq të re të rrëmbyer aq egërsisht nga një shkelje e papërgjegjshme e rregullave më ka gërryer me ditë dhe net. Edhe kur i shkruajta tani që po i lexoj këto rreshta prapë kam një ndjenjë shumë të fortë revolte për faktin se shkelësi i cili u kthye në vrasës, nuk ishte një pushues i zakonshëm por një punonjës policie, që normalisht dhe si pushues duhet të jetë shembulli i respektit për ligjin dhe për rregullin. Ky fakt e bëri tragjedinë jo vetëm për prindërit e familjarët e vogëlushes e për çdo shqiptar jo thjesht të dhimbshme, por dhe shumë revoltuese për shkak të profilit të autorit. Ajo tragjedi nuk ishte, nuk do ketë e nuk ka sot asnjë ngushëllim se nuk ka si të ketë ngushëllim për familjen e një fëmije viktimë, ama është vendi të thuhet se në kulmin e një dhimbje ekstreme ajo familjen e thejshtë tregoi një vetpëmbajtje të hatashme”.
Discussion about this post