Punimet për ndërtimin e Aeroportit të Vlorës janë pezulluar pasi punonjësit kanë dalë në protestë për disa ditë, duke kërkuar pagesën e rrogave të prapambetura.
Sot, ata kanë bllokuar hyrjen në kantier si shenjë e pakënaqësisë dhe presionit ndaj kompanisë për të marrë pagat e tyre.
Punonjësit shprehen se janë prej disa muajsh pa marrë pagat e tyre dhe ndjehen të lënë pas dore nga menaxhmenti i projektit.
Ndërkohë ata kanë pezulluar protestën pas negociatave me përgjegjësit e firmës, që iu kanë premtuar se deri të premten do t’u kalohen të gjitha pagat.
Punonjësit kanë paralajmëruar se nëse premtimi nuk mbahet të premtën do të ketë pezullim të punimeve dhe protestë tjetër
“Drejtuesit duhet të dinë gjendjen që po kalojmë dhe mos ta marrin me të tallur. Nuk shtyhet më me fjalë, hë se do e rregullojmë, hë se do e rregullojmë, punëtorët nuk vijnë më në punë. Unë nuk bëj shaka, ti je autoritari ku ne të kërkojmë llogari ty dhe ti i kërkon llogari atyre më lart, ne duam një gjë të saktë për punën e pagesave”, u shpreh një nga protestuesit.
Discussion about this post