Një armë zjarri pistoletë me municion luftarak, një automjet dhe dy celularë janë sekuestruar nga Policia e Fierit gjatë një operacioni të zhvilluar pasditen e djeshme në lagjen “Apollonia”.
Shërbimet e Patrullës së Përgjithshme të Komisariatit të Policisë Fier, me mbështetjen e Forcës së Posaçme “Shqiponja”, ndërhynë pas informacioneve të marra në rrugë operative se me një automjet tip “Audi” po lëviznin persona të armatosur.
Gjatë ndërhyrjes, drejtuesi i mjetit dhe pasagjerja tentuan të largoheshin, por u kapën menjëherë nga efektivët e policisë. Në kontrollin e ushtruar, në çantën marsup të drejtuesit të mjetit u gjet një armë zjarri pistoletë me municion luftarak, e cila u sekuestrua si provë materiale, së bashku me automjetin dhe dy aparate celularë.
Në përfundim të veprimeve hetimore, u arrestuan në flagrancë:
-
G. N., alias G. S., 40 vjeç, banues në fshatin Sulaj, për veprat penale “Mbajtja pa leje dhe prodhimi i armëve, armëve shpërthyese dhe i municionit” dhe “Mosbindja ndaj urdhërit të punonjësit të policisë së rendit publik”.
-
A. P., 31 vjeçe, banuese në fshatin Portëz, për veprat penale “Veprime që pengojnë zbulimin e së vërtetës” dhe “Mosbindja ndaj urdhërit të punonjësit të policisë së rendit publik”.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Fier për veprime të mëtejshme.
Discussion about this post